hjunep

Moshe muni lex anakne: - Anakke sax solah, nane jax wayem merarix kance dedare sax ke pilexangm. Anakne nimbal:- Lagux amax, aku jax merarix kance dedare kemelexanku. - Anakke tunax male, dedare sine anak Bill Gates. -_Aox, lamun meno jax Amax.

Terus Moshe lalo bedait kance Bill Gates. Moshe muni tipax Bill Gates: - Bill, aku beduwe terune sax cocok gati jari semamax anakm. Bill Gates nimbal: - Lasingan anakke masi kodex ndexman wayen merarix dengan! – Inix doang, lagux kanak bajang senuxn ye jari wakil direktor Bank Dunie. - Lamun meno jax bau te atur laun, lemax ke kedex
anakke adexn mele, ongkat Bill Gates.

Meno jarin, Moshe terusne bedait kance Presiden Bank Dunie. Wahne sax kenalang dirixn, muni ye tipax amax presiden no: - Amax presiden, aku beduwe kanak bajang sax ke rekomendasiang sax paling cocok jari wakil presiden bank senixn.

Amax presiden nimbalin: - lagux wah luwex wakilke, malah kelebihan olex sax teperluang! - Mene entan amax presiden, kanak bajang senuxn, ye menantun Bill Gates, menu ampoxke badaxde. -Ssssseberax julux, aox aneh, jax ke bahasen bareh…

Demikian dan maaf,
yang Ikhlas
Hazairin R. JUNEP

Sopox dedare Cine aran Li Li merarix terus endot kance semamax dait inax mentowaxne. Leman waktu sino, Li Li wah ngidap base ye ndexne tao mbenderang dirix kance inax mentowaxne lex pekare ape juwax. Pikiran dait angkune belainan gati, Li Li gedek banget dait ndexne demenang mentowaxne. Li Li endah kerepne te silix isix mentowaxne sino. Jelo liwat, ahad liwat, Li Li dait mentowaxne ndexne wah engkah saling amet dait begejuh. Ape lacur seke suwe seke lenge jarin sesambungan duwe dengan sine, pedahal lex adat Cine, Li Li wajib nurutang selapux pengendeng mentowaxne.

Selapux pesualan dait pegejuhan lex bale, seken nyusahang semamaxne sax miskin. Kejarian wah Li Li ndexne tahan, marax api sax nyale atene sengax te kuasain lalox six mentowax, puputne ye jax gawex sopox niat.

Li Li sugul lalo jok batur amaxne sax sholeh, aran Amax Huang. Amax sino pegaweanne beniage owat tetioxan Cine. Li Li bebadax selapux ihwal sax jari cobaan idupne kance mentowaxne. Terus ne ngendeng asex lex Amax Huang, agene te embeng racun sax ne kawih mungkasang semerix pondehne.

Amax Huang ngindeng indeng sebrax terus kemosne, muni ye, : ” Li Li jax kutulungm dende inges, lagux dengahke sax tonggah dait gawex ape sax ke suruxm gawex”. Li Li nimbalin, ” aox amax, jax ke gawex ape
juwax saxde surux”.

Amax Huang tame boyax selapux sax te perluang lex cecopok sax luwex berisi tetiwoxan gero. Seberax mudi sugulne jaux sundungan kodex. Ye badax Li Li, :” ndexm kanggo jelap jelap sematex mentowaxm, sengax dengan luwex jax was was lex kamu. Meno ampoxke bengm tetiwoxan gero sax luwex sax bau nyematex mentowaxm adeng adeng. Bilang jelo periapang mentowaxm empax atawe manuk terus toloxang sekecot rerebu senixn. Adex ndarax dengan was was lex kamu inges, bilang jelo usaheang bi onyax onyax dait bagus bagus ntan tulung mentowax. Piyaxn jari sahabatm. Ngkahm begejuh dait taatin ape kemelexne, pokokne layanin ye marax datu. Kedemen Li Li dengah ongkat Amaxno. Langsungne ulex terus ne piyax lakaran nyematex mentowaxne.

Ahad begentix ahad, wulan begentix wulan, bilang jelo Li Li meriapang mentowaxne sax maix maix. Li Li inget gati pesen amax Huang, adexne ngkah jangke arax was was lex dengan, jari ne jagax gati perasaanne,
taat lex mentowaxne, maraxne ngelayanin inax mesax dait besahabat.

Wahne enem wulan liwat, suwesane lex bale jari begentix, luwih seneng ye pade. Li Li berajah jagax perasaan pacu pacu, sampe ndex ne wah sili, atawe sepax angenne. Ndexne wah begejuh sekali bae kance mentowaxne, sax nane wah jari dengan towax sax solah ate dait besahabat.

Adat kebiasaan mentowaxne seke solah. Mulaine tersena lex Li Li marax ntan tersena lex anakne mesax. Ye mulai demen becerite lex selapux baturne, base ye beduwe menantu sax paling solah sax arax lex dunie  sine. Li Li dait inax mentowaxne nani sene jari raket gati sesambunganne.

Semamax Li Li milu girang atene gitax sesambungan seninaxne dait inaxne. Sekex jelo Li Li lalo ojok amax Huang dait ngendeng tulung malik. Muni Li Li, ” Amax Huang, tulungke gamax, berembe ntanke adexne ndex mate mentowaxke six racun sino. Ye wah begentix jari dengan solah dait aku endah tresna marax inaxke mesax. Ndexke reda ye jax mate six racun sax ke bengne bilang jelo no”.

Amax Huang kemos dait nganggux anggux. “Li Li ngkahm parap. Ndexke wah mbengm racun. Rerebu sax kebingm senuxn vitamin adexn seke sehat. Sopox sopoxn racun sax arax ye sino sax arax lex angen dait adatm dende solah. Lagux nani jax selapux wah bersi tegentix six tersena, irox asex dait perhatian lex mentoaxm”.

Hikmah : ape si talet mex ye mex petex , ape si mbeng mex ye me terimax!

Glossarium;
Base - bahwa
Mbender – menyesuaikan
Sesamungan - hubungan
Puputne – akhirnya
Tetiwoxan – herbal
Mungkasang – menyelesaiakn
Semerix pondeh – denadam keseumat
Tonggah – teliti, hati hati
Cecopok – kotak
Was was – curiga
Lakaran – rencana
Sampe – sehingga
Sepax – kecewa
Raket – erat

Wallahualam bissawab

Demikina dan maaf

Yang ikhlas,
Hazairin R. JUNEP (04.06.08)

Assalamualaikum WR WB

Lox Mdan, sopox pepadu Sasak sax wah besekole lex Malang ulexne jox Selong, jangox dengan toax sax begax suwe ndexne dait. Sopox galeng tokol tokol ye lex berugax sax te piyax lex bebucun rurung jari taox ngeronde. Kumpul dengan bajang pade ngeraos. Arax sax becatur, beceki dait bedomino. Betarox gantung bateri lex kentokne. Arax sekex kanak sax jangke baos telingane kiri kanan lagux ndexne jerax jerax maen. Ketatalan gati kanak bajang ino pade bisang waktu lex bog dait berugax.

Arak sekex bebajang beketowan lex Lox Mdan, ” Kumbexne ampox side ndex lalo bejumat Mdan? Terus Mdan becerita ye lex batur sax beketowan sino, belo tuturne.

Aku terus doang bejumat wah 25 taon, wah ku dengahang hotib ngeraosang segale ruen pekare, arax jage 1000 luwih hotbah. Lagux sekex sekex ndarax six ku ingetang ape sax wahne ceramahang ino. Sengax meno  ndarax angenku lalo bejumat bis bisang waktu dait tenage semeno juax hotibne ye bisang waktu doang beceramah.

Selapux bebajang sax milo ngotok tadah kembelas lagux Lox Mdan sine dengan te ajin six mengene, jari separo sadu separo ndex batur sax lain nanggepin reraosan ino.

Untung arax sopox dengan sax tokol lex sedin berugax berontex ontex naene, sampixne ngerasax hawe sax mel gati sengax jeraxne ujan ngonex. Ye sino Amax Abung, timax ndexne wah besekole atas atas lagux pacu gatine ngaji dait sembahyang. Dengahang raos Lox Mdan terus ndarax tao nimbalin, langsung ye krem dait ne bagusang petokolne. Terus bae nengeraos maraxne nyadex pengajian.

” Aku wah merarix 30 taon. Epen balengku meriapang aku bilang jelo, mun ku rekeng luwex macem kakenan sang arax jage 30 yu macem periapanne. Lagux ndarax mane mane sopox aku inget menu sax wah ku kaken. Lagux sopox keyakianku, periapan epen balengku sino piyax aku sehat dait kowat bagewean. Lamun epen balengku ndex sadex aku mangan  wah laexku pelot. Semeno juax lamun ndexku lalo bejumat agen ku bau mangan rohani, wah laex gati kumate rohani.

Timax po ndex mex idap ape ape lagux, Nenex kaji Sak Kuwase terus jagax ite, lex mbe juwax.

Keyakinan sino bau gitax sax ndex ketempo, bau percaya lex ape sax mustahil dait nerimax ape juwax sax ndexne mungkin.

Araxan mex besyukur lex De side Nenex sax beng ite mangan badani dait rohani. Lemax piran piran arax setan berontok lex lawang balem, kareng mex muni: Nggaxne Nenex kaji doang taox ku ngendeng dait nyembao.

Yakin lex De Side Nenex marax dengan wute percaye lex serngenge, ndexne kernax begitax, lagux kernax YE te raseang.

Glossarium:

Galeng –sore
Beceki – main ceki
Kentok – telinga
Ngotok- omong kosong di pinggir jalan
Nimbal – jawab
Krem- berdehem
Yu – 1000
Mane mane – bahkan, satupun, hatta
Plot- mati
Berontok – mengetuk
Ketempo- terlihat
Nyembao- berlindung
Wute - buta

Wallahualam bissawab

Demikian dan maaf

yang ikhlas
Hazairin R. JUNEP

Lox Bedul olex desa Pijot, bebale lex memontong deket pengembulan paling belex sax arax lex rerau sax galuh gati. Setutux tebegitax lex musim gero sine nggaxne tanax bangket sax belax belax te obong six
serngenge.

Bilang jelo pegaweanne boyax rebu atawe roman jari impan kaoxne. Seke suwe seke sengke ne maux rerebu gero sengax lowex batur lain sax ingon sesato lex andaran dasan Lox Bedul ino.

Sopox kelemax sugul ye tokol lex sedin jebak balene sampix gitax bangket sax seke gereng six panas surye. Be pesex mesax ye ngeraos: ” Nenex kaji, ngeraos aneh kance aku”. Liwat kedit lex atas otakne  terusne njontox lex lolon bagex sax nyengke bebuax. Kedit sino bepeok peok. Lox Bedul langusng ne nyemprax kedit sino, : “setan alas, tedox tedox cucuk mex, bareh ndex ku dengah ape ongkat Nenex lamunne ngeraos lex aku”. Lagux ndarax suare dengahne.

Leman sino sorak ye muni, : Nenex kaji, ngeraos gamax aneh”. Ngempok guntur lex awang. Lox Bedul besumpax senax lex guntur ino, sengax ndexne bau dengah ape ape. Sampix gerumun tame jok balene, ngantih jangke peteng. Lex kemalem sino sugul ye jox lelambur tengax tengax selak bale dait baran kaoxne. Malik ye muni: ” O Nenex kaji, meletku bedait aneh”. Gumintang njerleng berentep entep lex awang tumben ne nyempoar lalox cahyene. Lagux tau sine ye nunduk dirix , ye ampox ndexne gitax ape ape.

Malikne gedeg atene, terusne sorak marax kowat ape : ” Nenex kaji, petitoxke gamax mukjijat sopox bae”. Beterus bae beranak seninaxne, beduwe anak mame ye! Lagux tau sine ndexne menge menge otakne base
bebayax sino ye te beng isix Nenex, ye wah mukjijat sino, jari upax menuse.

Puse gati angenne dengan sine masi ne sorak, : “Melengke entixDe Nenex kaji, icaninke bau idap De Side Nenex kaji”. Jeraxne muni, liwat hawe sax mel ngosap sangkepne. Lagux dengan sino bolangne muwene andang lain, bongkorinne hawe sax mel ino.

Lox Bedul wah begax suwene jari jemaah andaran Sasak lex duniye maye, jari tokolne lex julun komputerne sampix irox atene, : ” O Nenex kaji, tulung ke gamax”. Pas ne bukax peti suratne, arax pesen olex semeton
jari jemaah lain sax becerite solah solah dait bedoa ihlas agen  rahayu semtonne. Lagux meno ndexne bace malah ne apus pesen batur terusne tulak begawean malik.

Lox Bedul sine sax asline aran Abdullah, ndexne sadar base Nenex Sax Kuwase sino, terus Ye barengin ite, lex kejarian belex ape kodex ape lex kejarian sax ndex pati te pedasang. Lex duniye maye meno masih,
ite terus berahayu tipax semeton jari dait besyukur, ngkah te pade puse atente lantaran bungkusan kejarian ndexne pade six pengarepte mesax. De Side Nenex Sax Kuwase ngeraos lex ite, lagux ujudne sax
jamax jamax dait sax ndex te dugax dugax.

Lex Gumi selaparng sino luwex gati semeton jari sax boyax Nenex, arax sax paran dirirx wah bedait arax sax ndex. Sax ngidap wah bedait girang ne pesiaxang pekare sepele, sax ndexman puas beboyax milu jari
liberal, abangan dait segale rue. Ye ampoxne pade luwexan begejuh sengax te paran dirix kenax mesax, pedahal selapuxne kenax, lagux ye kurang ihlasne pade nerimax kenyataan base ite sine sekedar te
beboyax. Lamun sax tetu wah bedait kan jangke nani ndarax tulax bebadax.

Glossarium:

Gereng = kering kerontang
Pesex = berbisik
Awang = langit
Lelambur = halaman
Selak = celah, antara
Gumintang = bintang
Nyempoar = melimpah, terang benderang
Bara/e = kandang
Puse = putus asa
Menge = terbuka pikiran, cerdas
Base = bahwa
Peti surat = inbox
liberal = islam bebas/liberal
abangan = orang yg tidak kuat keyakinan pada agamanya

Assalamulaikum WR WB

Saya sukanya flash back agar dapat belajar dari sejarah, sekedar belajar mengambil hikamh saja, jangan sekali mau kembali ke sejarah.

Akhir th 70 an pepadu2 sasak sangat bergelora semangt belajarnya, salah satu yang memukau adalah elektronika. Beebrapa tahun setelah itu booming intercom dan alat elektronika, bangsa sasak yang telah gembar gembor belajar tidak mebuat apa2 kecuali jadi penikmat barang elektronika mulai pertengahan 80an.

Akhir tahun 80an booming krusus computer, diman mana pepadu2 berebut jadi ahli computer yang waktu itu masih rumit operasionalnya. Sekarang  internet dan IT pada umunya sudah merajalela diseantero nusantara. Berapa biaya habis untuk elektronika, komputer dan IT sampai detik ini? Tak ada yang mau menghitung.

Tidak ada yang salah pada trend2 yang terus berubah dan dikejar dengan tertatih tatih oleh para pepadu kita. Maslahnya adalah pendidikan dasar umum diabaikan. Mereka merasa cukup kalau sudah bisa bikin walki talkie dan interkom dan kini bangga sekedar jadi pemakai internet, meski hanya 1% saja dari total penduduk.

Keterampilan hidup (life skill) yang bersinggungan langsung dengan peri kehidupan bangsa Sasak ditelantarkan. Para pepadu yang seharusnya siap meneruskan pertanian, perkebunan, perikanan dan peternakan yang seharusnya menuju modernisasi tidak ada yang urus. Sawah banyak berubah jadi lahan kering dan rusak karena irigasi hancur.  Peternakan, perikanan tidak dimiatikarena kotor dan uang kecil. Karena tidak suka uang kecil uang besar tak juga datang, momot sudah… kalau segala sesuatu penyokong kehidupan seperti disebutkan itu diabaaikan, karakter macam apa yang bercokol didada pepadu kita?

Ketika lapangan kerja makin menyempit, tenaga melimpah keterampilan rendah, tidak ada pilihan jadi buruh petik Sawit atau buruh bangunan di Malaysia. Orang pemerintahan tak merasa terusik melihat ratusan TKI bergelimpangan. Di bui diusir dst.

Banyak orang pemda dan anggota dewan yang melancong ke LN untuk studi banding tidak lebih untuk memuaskan kegawahannya, hanya heran dan menghabiskan uang saku… seharusnya mereka mencatat baik2 TKI yang seperti apa dibutuhkan di masing2 negara dan lalu disipkan. Tidak, sekali lagi tidak, orang2 itu malah merancang cara2 kotor untuk mengambil keuntungan dengan menipu TKI dari berangkat sampai pulang.

Anak2 Bali dan Jawa yang pergi ke Australia dan NZ telah disipakan dari rumahnya. Th 2005, Ada seorang pemuda Bali yang mengajukan permohonan bantuan 2000 dolar untuk mengurus pekerjaan di NZ sebagi
pemetik buah. Kami tidak memenuhi permintaannya karena dia tak dapat melaksanakan syarat yang ditentukan. Sebulan kemudian saya dengar dia jadi interpreter di pabrik mebel di Jepara, untuk mengumpulkan uang agar dapat jadi tukang petik buah di NZ.

Pekerjaan interpreter sangat jaranga ada, sifatnya sporadis, upah saya sebagai interpreter 100 euro/hari dan paling untuk 5 hari kerja dengan rata2 dibawah 8 jam sehari. Mengapa anak Bali itu memilih jadi  pemetik buah, karena upahnya tinggi dan kontrak setahun dua.

Bandingkan dengan TKI Sasak, pendidikan rendah, ketrampilan tidak ada, omong bahasa sasak saja cepat lupa. Kebanggan diri tidak ada di kalangan pepadu Sasak. Identitas kita sangat rapuh. Meskipun sudah  kuliha sampai S3, coba Tanya apa yang diketahui tentang kesasakan. Atau sederhananya apa artinya menjadi Bangsa Sasak bagimu, semeton? kalau gak sanggup jawab, tanya yang lebih mudah lagi, apa artinya jadi seorang muslim? Tidak bisa juga ? tanyalah; apa yang engkau inginkan dalam hidupmu?

Kalau sudah dapat menjawab pertanyaan itu, di Lombok juga bias dapat  uang besar…

Cukuplah Allah menjadi pelindungku dan penjaminku, aduhai mengapa tidak juga yakin? SMS santet saja bikin pingsan, gimana mau kerja benar?

Wallahualam bissawab,
Demikian dan maaf

Yang ikhlas
Hazairin R. JUNEP